211.- O CICLO DE RECITAIS “POETAS DI(N)VERSOS” RECIBE Á LINGUA VASCA

NOTICIAS PATROCINADAS por Literaturas Com Libros ¿QUIERES PATROCINAR ESTAS NOTICIAS? publicidad@literaturas.com

O ciclo de recitais poéticos que dende o pasado novembro recibe na Coruña a un/ha poeta en galego xunta outro/a de calquera das outras catro linguas da Península Ibérica, convida nesta ocasión a un dos máximos renovadores da literatura actual en lingua éuscara. Chegando ás últimas etapas a celebrar dentro deste curso, complétase xa o obxectivo de facer pasar pola Casa da Cultura Salvador de Madariaga da Coruña -sempre nos terceiros martes de mes e en horario de 20:30- a algúns dos mellores escritores da actualidade en galego, castelán, catalán, portugués e vasco.

A cita será o martes 20, no lugar e hora habitual e con entrada libre ata completar aforo, e a ocasión reunirá a dous poetas mozos pero xa cunha aplaudida traxectoria: a ceense María Lado fará parella con Kirmen Uribe, nado en Ondarroa (Bizkaia) e, ademáis de poeta, último gañador do Premio Nacional de Narrativa co seu debut novelístico: Bilbao-New York-Bilbao.

Ela xurdiu do “Batallón Literario da Costa da Morte”, investiga novas canles de difusión para a poesía máis alá da páxina dotando aos seus textos dunha potente dimensión oral e interpretativa e consegue unha expresiva complicidade co lector; el deslumbrara a público e crítica cun poemario traducido en Visor como Mientras tanto dame la mano, ten participado en multitude de encontros literarios arredor de Europa, América e Asia e un dos seus poemas foi escollido por Patxi López para a xura como lehendakari.

Chégase así á sexta edición do único ciclo estable que en Galicia ofrece lecturas públicas de poetas de dentro e de fóra do país, unha cita mensual continuada que está a recibir unha calorosa acollida por parte do público coruñés e galego. As sesións, dirixidas pola poeta Yolanda Castaño para a Concellaría de Cultura do Concello da Coruña adoitan reunir arredor de 200 lectores e lectoras que aproveitan tamén a ocasión para mercar e solicitar sinaturas nos libros dos seus escritores favoritos.

No vindeiro mes terá lugar a última das sesións de “POETAS DI(N)VERSOS”, interrumpido durante os meses de verán para regresar en outubro a dar de novo todo o protagonismo á palabra poética nas voces dos seus creadores/as.

(Entre as 18h e as 19:30 de cada unha das xornadas do ciclo, no hall do Hotel NH Atlántico habilitarase un espazo e un tempo que os poetas convidados podan dedicar á prensa interesada).