238.- O ÚNICO CICLO POÉTICO EN ESPAÑA CON AUTORES LOCAIS E INTERNACIONAIS CONTINÚA ATA XUÑO

publicidad

POETAS DI(N)VERSOS, a coidada programación poética impulsada pola Concellería de Cultura do Concello da Coruña e dirixida pola poeta e dinamizadora cultural Yolanda Castaño continúa con novas citas mensuais ata xuño. O ciclo de recitais poéticos dobres que comezara co curso académico en outubro, rematará tamén con el, tras o último trimestre de versos recitados nas súas linguas orixinais. Poetas de Italia, os Balcáns e Brasil recitarán no Ágora da Coruña nos próximos meses, sempre a carón dunha figura galega, en sesións gratuítas e abertas a todo o mundo, coa vontade de achegar á cidadanía coruñesa e galega un xénero aínda considerado minoritario. Sempre na procura da máxima calidade literaria, tanto como da maior diversidade a nivel de xénero, xeración, estilo e forma de concibir a poesía, POETAS DI(N)VERSOS ofrece unha mostra ampla e representativa do que se está a producir na poesía contemporánea mundial ao tempo que pon en valor a escrita en galego. O ciclo, que conta xa catro anos de existencia e un notable público de seu, constitúe a única programación estable de poesía de toda España que inclúe poetas internacionais, neste caso ademais dos locais.

De xeito máis inmediato, un poeta vigués e outro xenovés amosarán o seu traballo o luns 22 de abril ás 20:30h. Manuel Forcadela e Claudio Pozzani demostran que a vontade experimental e o emprego de outros recursos expresivos para enriquecer a poesía non son só patrimonio das últimas fornadas de creadores. Autores xa veteranos en italiano e galego, os dous introducirán elementos sonoros ou videográficos na súa actuación. Ao mes seguinte, o luns 6 de maio, a poeta viveirense Olalla Cociña unirase a unha das grandes promesas da poesía en Europa. O macedonio Nikola Madzirov é un dos nomes imprescindibles da poesía europea dos próximos anos, e chegará estreando o que será o seu primeiro libro traducido ao castelán, publicado polo prestixioso selo de Pre-Textos. A sesión de xuño promete sorpresas para pechar o ciclo: creadores que tenden a man a outras linguaxes creativas para expresar o poético. Branca Novoneyra apoia os seus versos na danza contemporánea e o brasileiro Márcio-André faino no son e na performance. Será o luns 3 de xuño no lugar e hora de sempre.

Así se pechará unha xeira de lecturas poéticas nas que se seguirá podendo gozar de traducións dos poemas estranxeiros, de solicitar sinaturas ao remate e -en xeral- de contar cun contacto directo con algúns dos e das mellores poetas actuais de todo o mundo.