148.- UN POETA GALEGO E OUTRO INDIO NO ÚLTIMO RECITAL DE “POETAS DI(N)VERSOS”

UN POETA GALEGO E OUTRO INDIO NO

ÚLTIMO RECITAL DE “POETAS DI(N)VERSOS”

A única programación poética que –de xeito estable- presenta un/ha poeta galego/a e outro/a internacional en Galicia toca ao seu fin. POETAS DI(N)VERSOS interromperá as súas citas mensuais durante os meses estivais e volverá en outubro cunha nova edición do ciclo de recitais dobres.

O broche final poñerano dous autores moi completos pero de xeografías ben afastadas. O ourensán Franciso X (Chisco) Fernández Naval fará dúo co indio Sudeep Sen. O primeiro reside dende hai 30 anos na Coruña e traballa como funcionario da administración, o visitante imparte aulas de Literatura Inglesa na Universidade de Delhi. O Premio Xerais de Novela, Premio de Poesía Fiz Vergara Vilariño, e Premio “Cidade de Ourense” en dúas ocasións, establecerá así un man a man cunha das voces máis representativas dentro da nova xeración de autores indios en lingua inglesa.

Será o próximo luns 11 de xuño ás 20:30h, no Auditorio do Centro Ágora da Coruña. Nun espazo aberto e gratuíto para todos os amantes ou curiosos pola mellor poesía feita tanto no país coma no resto do mundo. Con este motivo editarase un novo folleto políptico, e convidarase a unha das librarías da cidade a que poña exemplares dos convidados a disposición daqueles que queiran solicitarlles sinatura.

Ademais, o tamén editor Sudeep Sen, vén de tirar do prelo unha informal pero coidada selección dos seus poemas en edición bilingüe inglés-galego, grazas ás traducións da directora do ciclo -a tamén poeta e dinamizadora cultural Yolanda Castaño, cuxos vertidos ao galego soarán no acto do día 11.

O ciclo impulsado pola Concellaría de Cultura do Concello da Coruña acadou en todas as súas sesións unha chamativa asistencia, demostrando que en tempos de crise segue a existir sempre un lugar para a poesía.