122.- DOUS ‘POETAS DI(N)VERSOS’ QUE NON DEIXAN INDIFERENTE A NINGUÉN

NOTICIAS PATROCINADAS por Literaturas Com Libros ¿QUIERES PATROCINAR ESTAS NOTICIAS? publicidad@literaturas.com

(Entre as 18h e as 19h de cada unha das xornadas do ciclo, no hall do Hotel NH Atlántico habilitarase un espazo e un tempo que os poetas convidados podan dedicar á prensa interesada).

O martes 16 terá lugar a quinta sesión do ciclo de recitais “POETAS DI(N)VERSOS” organizado pola Concellaría de Cultura do Concello de A Coruña e dirixido pola poeta Yolanda Castaño. Nesta ocasión, o dúo de convidados estará formado por dous escritores dotados de marcadas personalidades e singulares traxectorias: a focense Luísa Castro e o madrileño Luis Alberto de Cuenca.

A primeira compatibiliza dende a poesía en galego á narrativa en castelán, ademáis de colaborar con artigos de opinión en medios galegos coma ‘La Voz de Galicia’, ‘Diario de Pontevedra’ ou ‘El Progreso’. Residente en Santiago na actualidade, a autora de Baleas e Baleas (1988) ou Amor mi señor (2005) ten acadado premios de novela como o Herralde, o Azorín ou o Torrente Ballester e de poesía como o Hiperión, o Juan Carlos I ou o accésit do Esquío, e representa un dos nomes máis influíntes para unha boa parte da poesía galega moza.



Luis Alberto de Cuenca, profesor de investigación do CSIC, doutor en Filoloxía Clásica, tradutor e ensaísta, conxuga o absoluto favor do público cunha fecunda obra que non deixa de mixturar con mestría o culto e o desenfadado, o circunstancial e o transcendente, case sempre coa mesma elegancia que ironía. Combinan nel tamén o rigor de quen ten ocupado cargos coma o de Director da Biblioteca Nacional ou o de Secretario de Estado –entre os anos 1996 e 2004- xunta a frescura do máis enxeñoso creador.

A cita terá lugar unha vez máis ás 20:30h no atrio da Casa da Cultura Salvador de Madariaga (rúa Durán Loriga), nun acto con entrada libre e no que será posible mercar ou solicitar sinaturas nos títulos dos autores convidados.


O ciclo “POETAS DI(N)VERSOS” foi inaugurado no pasado novembro e establece citas mensuais nas que, cada terceiro martes de mes e de xeito estable, é posible escoitar de xeito directo ás mellores voces poéticas nas 5 linguas da Península Ibérica. A iniciativa –única en Galicia con estas características e ampliada ata o mes de xuño- está a obter unha excelente resposta, contando asistencias mínimas de 200 persoas por recital e demostrando que no noso país se pode contar cun público propio para a poesía.

(Entre as 18h e as 19h de cada unha das xornadas do ciclo, no hall do Hotel NH Atlántico habilitarase un espazo e un tempo que os poetas convidados podan dedicar á prensa interesada).